“قول حاضر وخلاص”
هما 12حرف – متعدش ورايا – لكنها من الجمل اللى بتعيش كتير اوى وبتجيب عقد اكتر من عدد حروفها – زى مانتو شايفين كده – فى الحقيقة فى جمل كتيرة جدا أثرت فينا واتسببت من غير مانحس فى رسم ملامح شخصياتنا
فى واحد صاحبى قال جملة عجبتنى اوى ” احنا نتاج تفاعلاتنا مع اهلنا بالسلب او بالايجاب ” يعنى ممكن كلمة من ابوك او مامتك تخليك تعمل تصرف معين قدام موقف معين طول حياتك
وكمان ممكن تخليك لما يحصل موقف معين قدامك يا اما تعمل التصرف اللى كان والدك بيعمله بالظبط يا اما تعمل عكسه بالضبط .
يعنى مثلا انا اعرف واحد صاحبى كان هيترفد من الكلية بسبب عقدة لانه ضرب معيد لمس وشه وهوه واقف وراه عشان يفجعه او يهزر معاه.. ولان صاحبى ده كان دايما ابوه بيضربه بالقلم على وشه اتعقد من اى حد يلمس وشه لدرجة انى شخصيا فوتتّ بوكس كان هيلبس فالنضارة لما جيت امسح حاجة من على خده واحنا طالعين من مطعم لانى مكنتش اعرف الحكاية .. بس المعيد ملحقش يفوته…
اللى شاغل بالى اوى بقى .. الواد ده هيتجوز ازاى ؟؟؟ ينفع واحد يتجوز واحده ومتلمسش وشه ابدا ؟؟؟؟؟؟
المهم- سواء جمل او تصرفات او انفعالات فهى بالقطع – حلوة بالقطع دى – عملت عقد او انجازات ..فشل او نجاحات .. مالاخر عملتنا احنا ..
اكتر جمله اثرت فيا انا شخصيا هى دى ” قول حاضر وخلاص” الجملة دى خلتنى بقول حاضر حتى وانا متاكد انى مش هقدر اعمل الطلب ده او الامر يعنى – آل طلب آل – بل انى ساعات كنت بقولها وانا مسمعتش اللى اتطلب اصلا..
بالرغم من ان سؤالى عن سبب الحاجة اللى بتطلب او عن تفصيل معين ممكن يخلى للطلب معنيين مختلفيين تماما او عن تفضيل الشخص اللى طالب لحاجة تانية قد تكون احسن بس هوه مش واخد باله منها كان ” ممكن” يكون مفيد جدا لشخصيتى اللى بقت مجرد محاوله لارضاء الجميع بدون حتى التفكير .. مش “ممكن” .. ده اكيد على فكرة..
ساعات كنت ببقى عاوز اقول معلومة لبابا او ماما هما ميعرفوهاش ولو عرفوها هيعرفوا انه مينفعش اصلا اعمل اللى هما عاوزينه يعنى مثلا .. انزل ادى لعمو فلان الكتب دى فالدور اللى تحتينا .. واكون شايفه مالبلكونة خارج مع اسرته ولازم بردو اقول حاضر وانزل واخبط وانا عارف ان مفيش حد هيفتح الا لو الشقة مسكونة بقى .. واطلعلهم واقولهم انه مش موجود تحت لانى اساسا شايفه من البلكونة وهو خارج .. وفى الوقت ده تظهر الديموقراطية اللى بتقول ” ومقولتش ليه كده مالاول بس ؟ بدل ما نزلت عالفاضى ” او ممكن تظهر الاتهامات اللى بتقول ان معنديش مخ .. مع انى لو كنت اتكلمت مالاول مكنش حد هيسمعنى وكان حد هيصرخ فوشى ” قول حاضر وخلاااااااااااااااااااااص”
اعتقد ان اغلب اهالينا كانوا فاوقات كتيرة مش فاضيينلنا عشان يسمعونا وعشان كده طلعت الحكمة او المثل او الخرافة اللى عشت عليها طول حياتى بان ” كلمة حاضر بتريح ” بس مكنتش فاهم ان الحكمة بتقول انك تقول حاضر وبعدين ” تنفض” لانى وقتها مكنتش اعرف يعنى ايه ” تنفض” دى..
وان كانت دى اكتر جملة علقت معايا وعملت كلاكيع لدرجة انى لما بناقش مديرى فالشغل مثلا فى حاجة هوه قالها غلط وبدل ما صوتى يكون مالى المكتب ثقة .. بكون بتكلم وانا يادوب سامع صوتى بالعافية لانى كنت ببقى متوقع انه هيصرخ فيا ويقولى بالانجليزى “كوول خاضر وخلاااس”
بس مش معنى كده بردو ان دى الجمله الوحيدة اللى بتتقال .. ولان قاموس اللغه واحد فى المجتمع المصرى كله تقريبا – بغض النظر عن الناس القليلة اوى اللى عايشه حياتها- احب اقولكم ان 99.9% - وللا خلوها 99.8% احسن يقولوا بنعمل انتخابات عالمدونة وللا حاجة- 99.8 % سمعوا الجمل دى وعانوا منها او عالاقل اغلبها…
- انا مش الخدامة اللى جابهالكو ابوكم
- ابقى تعالى “…….” على قبرى لو فلحت
- انت فاكر انك بتذاكرلنا .. وللا هتشيل وتعبيلنا ؟؟ اللى بيشيل قربه مخرومة – وفى روايات اخرى “مقطوعة” – بتخر على راسه هوه
- مش عاوزه اسمع نفس حد فيكم .. (بيدربونا على الديموقراطية اللى فالبلد الظاهر.. تربية بردو)
- شايفين ولاد خالكو ماشيين زى الالف .. مبيغلطوش غلطة .. مش شياطين زيكوا .. بس انا اللى معرفتش اربى
- مش عارفة ايه الذنب الفظيع اللى عملته عشان ربنا يبتلينى بيكم
- هى كده يابنى .. متوجعش دماغى.. لما تكبر هتبقى تفهم ..
- هات فلوس العيدية عشان احوشهالك …
- والله هوه ده الاكل اللى موجود .. مش عاجبك .. عنك ما أكلت
-مانتا ماشيلى مع شويه صيّع شبهك
-مفيش مذاكرة عالسرير .. انتا بتضحك علينا وللا على نفسك
- قوم نام يا خويا .. اللى ذاكر ذاكر من زمان ..
- لو رجعت بعد الساعة (̷ ارجع نام مكان ماكنت.. “تختلف الساعات طبعا من الساعه 9 لحد الساعه 1 على اقصى تقدير”
- قوم ذاكر يابنى وشوف حالك .. متحرقشى دمى
-ربنا يفرق بينى وبينكم بقى .. انا تعبت
- لو اللى بيتصل اخره (274) متردش
- الهى اشوفك ……… يارب بحق جاه النبى ” بردو بتختلف من مشلول لمعمى لمخروس لمحروق.. المهم ان كلها حوادث”

وجمل تانية كتييير اوى لو قعدت اقولها مش هنخلص .. كانت بتتقال كانها نشيد وطنى يصاحب موقف معين .. حتى انا واخواتى ساعات كنا ندخل الاوضة وامى بره ونقعد نقول معاها اللى هيا بتقوله كاننا بنسمعه ..
ممكن تكون الجمل دى كلها كانت من ورا قلبهم او اغلبها بس المشكلة اننا فهمنا ده – ده لو فهمناه- بعد ما الجمل دى تكون عملت عمايلها فينا
صحيح .. نسيت اقول شوية جمل خاصة بالبنات
- قومى البسى حاجة مقفولة .. اخوكى قاعد .. خللى عندك شوية مالاحمر “الدم يعنى ”
- اللى قدك متجوزين ومخلفين عيال وشايلين بيت
- مفيش خروج قبل مالشقة تتوضب ” واحيانا قبل المطبخ ما يخلص – وغالبا مطابخ مصر كلها مش بتخلص”
- امسحى القرف اللى فوشك ده قبل ماتنزلى
- ده امه داعية عليه اللى ربنا هيبتليه بيكى

الغريب بقى انهم فاوقات تانية بيقولوا عكس كل الكلام ده وبالاخص ساعة لما تتقدم لواحده او واحد يتقدملك
- والله ده حنين وطيوب خالص
- دى بنتى دى اللى فيهم والله .. اميرة .. وحنينة .. ومفيش اخوها
- والله دى شايله البيت عنى .. وست بيت ايييه .. مقولكش
- طب تصدقى بايه يا ام فلان .. انا معنديش فالدنيا اغلى منها والله
- هوه صحيح ابنى واخاف عيه بس طول عمره راجل ومحدش بيدخل فخصوصياته

وخد من ده كتير بقى .. واللى بحسه الصراحة انهم بيبقوا عاوزين يخلصوا مننا ……. ما علينا

القصد من الكلام اللى قلته فالحلقة دى اننا زى ما اهالينا ربونا وعلمونا وكبرونا – على حد تعبيرهم- فهما كمان اتسببولنا – عن دون قصد- بمشاكل نفسية وعقد وعيوب شخصية نتيجه لجمل او انفعالات كان ممكن انها متحصلش
بس الاهم من كل ده اننا لما نيجى نربى ولادنا – ده لو عشت وشفت اليوم ده يعنى – نربيهم من غير الجمل اللى بتقتل جواهم الذكاء او الشجاعة او الفهم او الطموح او النجاح او الامل ..
ياريت نحاول نسيب كل حاجة حلوة عايشة ومنستعجلش لانها فبلد زى بلدنا هتموت بردو بس تكون عاشتلها يومين

حاجة اخيرة احب اختم بيها .. وهى قالهالى مدير الموقع اللى انا فيه فى خلال مناقشة حول التربية
كنا بنتكلم عن ان الولد مش المفروض انه يتعود انه يبص لاصحابه عشان ميترباش جواه الحقد ويتعود يقارن نفسه بالناس دايما وكان رايه انه لما بنته او ابنه الصغيرين يتكلموا عن حاجة مثلا مع حد من زمايلهم فالفصل خلال الكلام او مثلا ان فصل طالع رحلة او اى حاجة كده .. لازم انه يجيب لهم زيها علشان ميحسوش انهم اقل من حد وبالتعود هيتعود الطفل انه ميبصش لحد لانه اساسا متعود انه زيهم
على عكس لو انك طول الوقت بتقوله متبصش على اللى مع صحابك او ملناش دعوه بحد او كل الكلام ده .. لان ده مستحيل مع طفل ولانه طفل غصب عنه هيعمل كده وهيبص دايما مع اللى مع زمايله وهيحس انه اقلهم وده هيعمل حاجة من اتنين يااما الطفل ده هيكون شاطر اوى عشان يثبت انه احسن فحاجة بس متفرحش لانه بردو هيكون معقد ويوم ما هيوصل ويبقى حاجة هيتنطط على خلق الله – وطبعا احنا عارفين امثال بالالاااااااف من العينة دى يا اما انه هيلجأ للعنف دايما فى اى مشكلة مع اى طفل زيه لانه بيكون بيغلى من جواه وبما انك قلتله متبصش فانت بنفسك اللى قفلت الباب قدامه عشان يكلمك او عشان تفهمه او تهديه ..
اتمنى ان كلامى ميكونش ضايق حد .. ولا حد يفهم كلامى غلط .. انا مقدرش انكر فضل كل ابهاتنا وامهاتنا علينا ومش هنسى ابدا ان ابويا كان بيمسك ايدى بالقلم ويسهر معايا وانا برسم الحروف
ولا امى اللى كانت بتصحينى كل يوم للمدرسة
بس اللى بقوله فالحلقات دى ماهوه الا محاولى لعدم تكرار الاخطاء .. مش اكتر
وسلامو عليكم ……… ” مش عاوز اسمع نفس